IT
EN
DE“L socors l é dantdaldut na costion de omegn e materièi e de chest binomie sion spervaji che l termen prinzipèl, anzi essenzièl, l é l om. Da sie spirit, estra che da sie lurier, depen soraldut l bon ejit e la svelteza de ogne azion de socors”.
L nasc del 1952
L alpinism e l socors sa mont i é semper stac leé a na vida forta. Jà dal scomenz del Otcent, canche i crepes i é doventé n lech de esplorazion e de aventura, i entervenc de emergenza vegnia fac de gra a la generosità e a l’esperienza de vèlch alpinist.
Pionieres desche Marino Stenico, Bruno Detassis e Cesare Maestri i é stac protagonisć de salvamenc da recordèr, ajache i se à troà da spes te condizions zis ries e zenza na organisazion struturèda.
Del 1950 l é sozedù na burta desgrazia su la Dolomites de Brenta. Trei joegn escurscionisć i é morc e i é resté te n stravert per dis alalongia, e demò una sia compagna de rampinèda se à salvà. Te la SAT – Società Alpinisti Tridentini e tel CAI – Club Alpino Italiano l é vegnù adalèrch la convinzion che fossa de besegn de n socors da mont organisà.
L dotor e alpinist trentin Scipio Stenico, con Mario Smadelli e Carlo Colò, l à lurà fora n pian deldut nef e da anteveder: meter su n Corpo del Soccorso Alpino slarià fora per l tegnir con Stazions ti paijes prinzipai japede i crepes, ogneuna coordenèda da n Capostazion.
Del 1952, a Pinzol, l é nasciù la pruma Stazion del Corp Socors da Mont. L’idea la se à sparpagnà debel te dut l Trentin e, dal 1954, te duta la Tèlia, canche l é stat metù su l Corpo Nazionale Soccorso Alpino e Speleologico Trentino (CNSAS) del CAI.
L Soccorso Alpino e Speleologico Trentino anchecondì
Amò anché, canche fèsc besegn, nos sion: endrezé, enjigné e co la reijes te dut l tegnir.
Estra che i intervenc operatives, porton inant ence ativitèdes de prevenzion e de sensibilisazion a la prudenza sa mont, per duc chi che vif l ambient da mont.
Del 2022 aon contà nesc setant’egn de storia con na mostra che, tras retrac da zacan e anchecondì e set paroles chief, l’à moscià coche l spirit de solidarietà de nesc socoridores l é jit inant e l é mudà adum coi mesi, i materièi e la tecniches.
Desćèria l catalogh de la mostraEnce tu date ju per nosc obietif. Adum per l teritorie e per la mont
Nosc lurier l vegn fat de gra a persones che met a la leta temp, atenzion e competenza a servije de la comunanza. Te pes contribuir a chest empegn che cresc col temp: tras na donazion, che pel servir per èrc, radio e formazion, opuramenter te pes cerner de scomenzèr n percors che te portarà a doventèr n socoridor.