IT
EN
DE
I evenc de formazion de la Scola Provinzièla del CNSAS Trentin e de la Scoles nazionèles i ge vegn resservé ai socoridores che é jà rué a piz col percors de selezion. Per poder aer azes a la formazion, donca, ge vel dantfora passèr la selezion e fèr pèrt del Soccorso Alpino e Speleologico Trentino.
Neves volontères
Ruèr ite tel Soccorso Alpino e Speleologico Trentino l é na dezijion che vegn ca da la voa de ge dedichèr temp e competenzes a la comunanza, cò l é besegn ence gran. Nosc percors de formazion te dèsc l met de crescer mingol a l’outa, emparèr neva capazitèdes e colaborèr con na squadra enjignèda e che tegn adum.
I requisic
Per doventèr socoridor o socoridora ge vel trop più che gust: ge vel competenza, atenzion e responsabilità. La selezions ne dèsc l met de valutèr no demò la competenzes tecniches, ma ence se se é bogn de entener l ambient, se mever da soi te contesć desvalives e mantegnir conzentrazion e festont te la situazions che domana dezijions prezises.
Donca te domanon:
Bona abilitèdes e esperienza alpinistica;
Na età anter i 18 e i 45 egn;
De passèr na selezion tecnich-atitudinèla col se mever su terens da mont, da crep, giacia e neif, che ogne an la vegn metuda a jir sun più dis, a scomenzèr da de uton.
Per de autra informazions, scrivene o chiamene ite:
Domana de amiscion
Per ruèr ite te noscia squadra:
- Contata l Capostazion competent per l raion olache t’es enciasà che l te dajarà duta la informazions che l é de besegn. La Senta Zentrèla te dijarà a chi te oujer.
- Do l prum contat te vegnarà dat l link per jir ite tel formulèr de adejion e scriver ite la domana online.
- Mana ite tia domana a la Senta Zentrèla dant dai 31 de aost de vigni an.
Documenc da portèr dant:
Tesserament CAI/SAT valevol
Document de identità valevol
Lizenza zivila de vidèr valevola
Fototessera
Zertificat medich agonistich ciapà da no più che 6 meisc
Curriculum de la ativitèdes alpinistiches e/o speleologiches
Sozi operatives
Do aer passà la selezion (pèrt crep e pèrt neif/giacia), te scomenzes n temp de formazion olache te empères la tecniches de socors sa mont. A la fin te doventes Sozio operatif e te pes tor pèrt a la operazions de socors.
Operador Socors da Mont
Operador Tecnich Sanitèr
Operador Socors de Basa demò per chi che vel fèr la spezialisazion speleologica.
Cò te fajarès pèrt de la organisazion, te te agiornes a do a do col tor pèrt a percorsc de formazion dediché, ai agiornamenc e col passèr la verifiches ogne trat de temp endrezé da noscia Scola.
L pian formatif
Te tia formazion per doventèr n socoridor, te cognes fèr vèlch passaje emportant.
Informazions
Domanes che vegn fat de spes
- Chi pelel pa tor pèrt al cors de formazion del Soccorso Alpino e Speleologico Trentino?
- Co se pelel pa aer azes al percors de formazion?
Per poder tor pèrt al percors de formazion ge vel:
- Aer de gran capazitèdes e esperienza alpinistica
- Aer i requisic de età pervedui
- Passèr na selezion tecnich-atitudinèla
Demò do aer fat chest passaje, se pel aer azes al cors de formazion, gestì da la Scola provinzièla en colaborazion co la scoles nazionèles.
- Che vegnel fat pa endèna l cors de formazion?
L cors perveit modui teorics e pratics en cont de:
- Movimentazion su corda, ancorajes, floscensuch e gestion de la portantina.
- Orientament, valutèr coche l é l teren e conscidrèr i risesc;
- Elemenc de prum socors sa mont e ti lesc sot tera ite (traumes, ipotermia, gestion del ferì);
- Lurier de grop, comunicazion e coordenament co la zentrèla operativa e coi etres componenc del sistem de emergenza.
Na gran pèrt del percors l vegn fat te n ambient reèl, se fèsc proes te situazions che ge somea trop a cheles che podessa sozeder.
- Cotant él pa lonch l percors de formazion?
La formazion no la se sera su demò con n cors, ma se trata de n percors che va inant col temp. Do da na pruma fasa, che dèsc l met de emparèr la competenzes de basa per lurèr en grop, vegn pervedù agiornamenc ogne trat de temp, agiornamenc de obligh e spezialisazions (levina, straverc, cogoi, chierida de jent e c.i.)
- La formazion la é de obligh ence do esser doventé operatives?
Ei. Per restèr operatives tel Soccorso Alpino e Speleologico Trentino vegn pervedù:
- Verifiches tecniches e proes pratiches
- Agiornamenc sanitères
- Ejecitazions vigni trat de temp e agiornamenc.
L é n empegn fora per fora e che serf per arsegurèr che chi che entervegn abie competenzes agiornèdes e che sie bon de lurèr a na vida coordenèda col grop.
- Él pa a la leta corsc orì al publich?
Na. I corsc de la Scola provinzièla del CNSAS Trentino e de la Scoles nazionèles i vegn endrezé per chi che fèsc jà pèrt del Soccorso Alpino e Speleologico Trentino.
Per duc i etres la sociazion met a jir ativitèdes de prevenzion e de sensibilisazion al jir sa mont con ferstont, desche scontrèdes de informazion e materièl de informazion.
- Co posse fèr pa a aer informazions dintornvia l cors de formazion?
Per aer informazions agiornèdes en cont de requisic, modalitèdes de selezion e calandèr de l’ativitèdes formatives te pes tor contat co la canzelaria del Soccorso Alpino e Speleologico Trentino:
- info@soccorsoalpinotrentino.it
- +39 0461 233166
Voci dal cuore del soccorso
Ence tu date ju per nosc obietif. Adum per l teritorie e per la mont.
Nosc lurier l vegn fat de gra a persones che met a la leta temp, atenzion e competenza a servije de la comunanza. Te pes contribuir a chest empegn che cresc col temp: tras na donazion, che pel servir per èrc, radio e formazion, opuramenter te pes cerner de scomenzèr n percors che te portarà a doventèr n socoridor.